ബി.ജെ.പിക്കെതിരായുള്ള കൊടകര കുഴല്പ്പണ കേസുമായി ബന്ധപ്പെട്ട ചാനല് ചര്ച്ചയ്ക്കിടെ ഏഷ്യാനെറ്റ് ന്യൂസ് കോര്ഡിനേറ്റിംഗ് എഡിറ്റര് വിനു വി. ജോണിന് നേരെ ഭീഷണി. ‘ദേശസ്നേഹികളുടെ ഹവാലയോ’ എന്ന തലക്കെട്ടില് നടത്തിയ ചർച്ചയ്ക്കിടെ ആയിരുന്നു വിനുവിന്റെ ഫോണിലേക്ക് ഭീഷണി സന്ദേശമെത്തിയത്.
ചര്ച്ചയ്ക്കിടെ വിനു തന്നെയാണ് ഇക്കാര്യം വെളിപ്പെടുത്തിയത്. ‘ഡു നോട്ട് ടു ബീ ടൂ സ്മാര്ട്ട് എന്നാണ്’ കിട്ടിയ മെസേജില് ഉള്ളതെന്നും മുഴുവൻ ഇവിയെ വായിക്കുന്നില്ലെന്നും വിനു പറഞ്ഞു. എത്ര പ്രതികാരബുദ്ധിയോടെയാണ് നമ്മുടെ കേന്ദ്ര ഏജന്സികള് ആളുകളെ ഭീഷണിപ്പെടുത്തുന്നത്. കള്ളപ്പണം വന്നിട്ട്, മിണ്ടാതിരിക്കുന്നവര് ആരെയാണ് ഭീഷണിപ്പെടുത്തുന്നതെന്നും വിനു ചോദിച്ചു. കേരളത്തിലെ ഉയര്ന്ന കേന്ദ്ര അന്വേഷണ ഏജന്സി ഉദ്യോഗസ്ഥനാണ് ഭീഷണിപ്പെടുത്തിയതെന്ന സൂചനയും വിനു നല്കി.
വിനുവിന്റെ വാക്കുകള്:
നമ്മുടെ കേന്ദ്ര ഏജന്സികള് എത്ര പ്രതികാരത്തോടെ ആളുകളുമായി ഇടപെടും എന്നെനിക്ക് മനസിലായി. എത്ര പ്രതികാരബുദ്ധിയോടെ ആളുകളെ ഭീഷണിപ്പെടുത്തും. ഈ കിട്ടിയ മെസേജില് പോലും അതുണ്ട്. തല്ക്കാലം ഇവിടെ വായിക്കുന്നില്ല. ഡു നോട്ട് ടു ബീ ടൂ സ്മാര്ട്ട് എന്നാണ്. ഞാന് പേര് പറയുന്നില്ല. പറയേണ്ടപ്പോള് പറയും.
അതായത് ഈ ചര്ച്ചയെപ്പോലും ഭീഷണിപ്പെടുത്തുന്ന, ഇതില് പറയുന്ന കാര്യങ്ങള് പോലും ഭീഷണിക്കായുധമാക്കുന്ന കേന്ദ്ര ഏജന്സികള് അന്വേഷിച്ചോളൂ. ഇനി എന്നെ അന്വേഷിച്ച് കുടുക്കുമെന്നാണെങ്കില് എന്തും അന്വേഷിക്കാം. സ്വാഗതം.
വെറുതെ പറയുന്നതല്ല. ഇത് പറയുമ്പോള് പോലും പൊള്ളുന്ന ഉദ്യോഗസ്ഥര് കേരളത്തില് കോടിക്കണക്കിന് ഹവാല പണം വന്നിട്ട്, കള്ളപ്പണം വന്നിട്ട്, മിണ്ടാതിരിക്കുന്നവര് ആരെയാണ് ഭീഷണിപ്പെടുത്തുന്നത്.
ഇ.ഡി ഏമാന്മാരുടെ ഭീഷണിയൊക്കെ കൈയില് വെച്ചാല് മതിയെന്ന് മാത്രമെ എനിക്ക് പറയാന് കഴിയൂ. കൂടുതല് സ്മാര്ട്ടാകേണ്ട് പറഞ്ഞാല് പേടിക്കാന് വേറെ ആളെ നോക്കിയാല് മതിയെന്നെ എനിക്ക് ഉന്നതനായ ഉദ്യോഗസ്ഥനോട് പറയാനുള്ളൂ.