അമൂല്യ ഗ്രന്ഥങ്ങളെ സാക്ഷിയാക്കി കോട്ടൂരിൽ വിദ്യാരംഭം
കുറ്റിച്ചൽ: കോട്ടൂർ ഗീതാഞ്ജലി ഗ്രന്ഥശാലയിൽ വിദ്യാരംഭം ഒരുക്കി. ആയിരക്കണക്കിന് അമൂല്യ ഗ്രന്ഥങ്ങളെ സാക്ഷിയാക്കി ഡോ : പരുത്തിപ്പള്ളി കൃഷ്ണൻകുട്ടി കുരുന്നുകൾക്ക് അറിവിന്റെ ആദ്യാക്ഷരം പകർന്നു നൽകി . മതേതര മൂല്യങ്ങൾ ഉയർത്തിപ്പിടിച്ച് 2014 മുതൽ ഗീതാഞ്ജലി ഗ്രന്ഥശാല ആരംഭിച്ച വിദ്യാരംഭത്തിൽ നാനാജാതി മതസ്ഥരും പങ്കെടുക്കുന്നു എന്ന പ്രത്യേകതയുമുണ്ട്. ഒരു ആരാധനാ മൂർത്തികളുടെയും ഫോട്ടോ പ്രദർശനം ഇല്ലാതെ അറിവിന്റെ അക്ഷയഖനികളായ അമൂല്യ ഗ്രന്ഥങ്ങളെ സാക്ഷിയാക്കി “അ” എന്ന ആദ്യാക്ഷരത്തിൽ മാത്രം അക്ഷരമധുരം നുകരുന്ന കുരുന്നുകൾക്ക് ശാസ്ത്രബോധവും മതേതര ചിന്തയും ഉണ്ടാകണം എന്ന ആശയം മുൻ നിറുത്തിയാണ് സംഘാടകർ ഇത്തരത്തിൽ വിദ്യാരംഭം നടത്തുന്നത് എന്ന് ഡോ ജയകുമാർ ഗീതാഞ്ജലി പറഞ്ഞു.
