കടുവയെ കൊല്ലാതെ പിന്നോട്ടില്ല; കളക്ടര്‍ യോഗത്തിനെത്തിയില്ല, പ്രതിഷേധം ശക്തമാക്കി നാട്ടുകാര്‍
വയനാട് മാനന്തവാടിയില്‍ നരഭോജി കടുവ സ്ത്രീയെ കൊലപ്പെടുത്തിയ സംഭവത്തില്‍ പ്രദേശത്ത് കനത്ത പ്രതിഷേധം. ഉച്ച കഴിഞ്ഞ് നടത്താന്‍ പദ്ധതിയിട്ടിരുന്ന യോഗത്തിലേക്ക് കളക്ടര്‍ എത്താതിരുന്നതോടെയാണ് പ്രതിഷേധം രൂക്ഷമായത്. കടുവയെ കൊല്ലണമെന്നാണ് മാനന്തവാടിയില്‍ നാട്ടുകാരുടെ പ്രധാന ആവശ്യം.
കടുവയുടെ ആക്രമണത്തില്‍ കൊല്ലപ്പെട്ട രാധയുടെ മൃതദേഹം സംസ്‌കരിച്ചതിന് പിന്നാലെ കടുവയെ കൊല്ലാനുള്ള നീക്കത്തില്‍ നിന്ന് വനം വകുപ്പ് പിന്നോട്ട് പോയെന്നാണ് നാട്ടുകാരുടെ ആരോപണം. കടുവയെ കൊല്ലാതെ ഉദ്യോഗസ്ഥരെ ക്യാമ്പ് ഓഫീസില്‍ നിന്ന് പുറത്തിറങ്ങാന്‍ അനുവദിക്കില്ലെന്നായിരുന്നു പ്രതിഷേധക്കാരുടെ നിലപാട്.
പിന്നാലെ കളക്ടര്‍ മൂന്ന് മണിക്ക് നടക്കുന്ന യോഗത്തില്‍ പങ്കെടുക്കുമെന്ന് ഉദ്യോഗസ്ഥര്‍ ഉറപ്പുനല്‍കിയെങ്കിലും എത്തിയില്ല. നാല് മണി കഴിഞ്ഞിട്ടും കളക്ടര്‍ എത്താതിരുന്നതോടെയാണ് പ്രതിഷേധം ആളിപ്പടരുന്നത്. കളക്ടര്‍ യോഗത്തില്‍ പങ്കെടുക്കാന്‍ വൈകുന്നതിനെ തുടര്‍ന്ന് പ്രതിഷേധം ശക്തമാക്കിയിരിക്കുകയാണ് നാട്ടുകാര്‍.
പ്രതിഷേധക്കാര്‍ ബേസ് ക്യാമ്പിന്റെ വരാന്തയില്‍ കേറി പ്രതിഷേധിക്കുകയാണ്. ഡിഎഫ്ഒ ഉള്‍പ്പടെയുള്ള ഉദ്യോഗസ്ഥരെ കാണണമെന്നാണ് ആവശ്യം. അതേസമയം വനം വകുപ്പ് മന്ത്രി എകെ ശശീന്ദ്രന്‍ ഞായറാഴ്ച വയനാട്ടിലെത്തും. 11 മണിക്ക് കളക്ടറേറ്റില്‍ നടക്കുന്ന അവലോകനയോഗത്തില്‍ പങ്കെടുക്കുമെന്നാണ് പുറത്തുവരുന്ന വിവരം.
