മെഡിക്കല് കോളേജില് അക്രമം നടത്തിയവരെ ശിക്ഷിക്കണം – ഡി.സി.സി
ക്രിമിനല് സ്വഭാവമുള്ള പാര്ട്ടി അനുഭാവികളെ യാതൊരു മാനദണ്ഡവുമില്ലാതെ തിരുവനന്തപുരം മെഡിക്കല് കോളേജില് അനധികൃതമായി നിയമിച്ചതിന്റെ പരിണിതഫലമാണ് തുടര്ച്ചയായി രോഗികള്ക്കും കൂട്ടിരിപ്പുകാര്ക്കുമെതിരെ ഏതാനും സെക്യൂരിറ്റിക്കാര് നടത്തുന്ന അഴിഞ്ഞാട്ടമെന്ന് ഡി.സി.സിപ്രസിഡന്റ് പാലോട് രവി ആരോപിച്ചു.
എക്സ്-സര്വ്വീസുകാര്ക്കു പകരം ഒരു ഏജന്സിയെ റിക്രൂട്ടിംഗിന് നിയമിക്കുകയും അതിലൂടെ പാര്ട്ടിക്കാരെ തിരുകിക്കയറ്റുകയും ചെയ്ത അനധികൃത നിയമനമാണ് മെഡിക്കല് കോളേജില് നടക്കുന്നത്.
ഇന്നലെ ഒരു യുവാവിനെതിരെയുണ്ടായ സംഘടിത മര്ദ്ദനം എത്ര ക്രൂരമായാണിവര് പെരുമാറുന്നതെന്നതിന്റെ തെളിവാണ്. അടിയന്തിരമായി കുറ്റക്കാരെ അറസ്റ്റുചെയ്ത് മാതൃകാപരമായ ശിക്ഷണനടപടി സ്വീകരിക്കാനും എക്സ്-സര്വ്വീസുകാരെ നിയമിക്കുന്നതിനും അടിയന്തിര നടപടി സ്വീകരിക്കണം. അനധികൃത നിയമനം നടത്തിയ ഏജന്സിക്കെതിരെ കേസെടുത്ത് അന്വേഷിക്കണമെന്ന് പാലോട് രവി ആവശ്യപ്പെട്ടു .
