മുതിർന്ന മാധ്യമ പ്രവർത്തകൻ കെ എം റോയ് അന്തരിച്ചു
കൊച്ചി: മുതിർന്ന മാധ്യമ പ്രവർത്തകനും എഴുത്തുകാരനുമായ കെ എം റോയ് അന്തരിച്ചു. 82 വയസ്സായിരുന്നു. കൊച്ചി കടവന്ത്രയിലെ വസതിയിലായിരുന്നു അന്ത്യം. സംസ്കാരം നാളെ എറണാകുളം തേവര സെന്റ് ജോസഫ് പള്ളിയിൽ നടക്കും.
ഇംഗ്ലീഷ്, മലയാളം ഭാഷകളിലെ പത്രപ്രവർത്തനരംഗത്ത് ഒരുപോലെ തിളങ്ങിയ വ്യക്തിയായിരുന്നു കെ എം റോയ്. കേരളഭൂഷൺ, ദി ഹിന്ദു, യുഎൻഐ, എന്നിവിടങ്ങളിലെ ലേഖകനായിരുന്നു. ദീർഘനാൾ മംഗളം ജനറൽ എഡിറ്ററായി പ്രവർത്തിച്ചിരുന്നു. എക്കണോമിക് ടൈംസിലും പ്രവർത്തിച്ചിട്ടുണ്ട്.
രണ്ട് തവണ പത്രപ്രവർത്തക യൂണിയൻ സംസ്ഥാന പ്രസിഡന്റ്, ഇന്ത്യൻ ഫെഡറേഷൻ ഓഫ് വർക്കിംഗ് ജേർണലിസ്റ്റ് ജനറൽ സെക്രട്ടറി എന്നീ നിലകളിലും കെ എം റോയ് പ്രവർത്തിച്ചിരുന്നു. മൂന്ന് നോവൽ രണ്ട് യാത്ര വിവരണങ്ങൾ എന്നിവയടക്കം നിരവധി കൃതികൾ എഴുതിയിട്ടുണ്ട്.
സ്വദേശാഭിമാനി കേസരി പുരസ്കാരം അടക്കമുള്ള നിരവധി ബഹുമതികളും അദ്ദേഹത്തെ തേടിയെത്തിയിട്ടുണ്ട്.
