കാട്ടുപന്നിയുടെ ആക്രമണം. ആയിരത്തോളം മുട്ട കോഴികൾ ചത്തു.
തിരുവനന്തപുരം പോത്തൻകോട് കാട്ടുപന്നിയുടെ ആക്രമണത്തിൽ ആയിരത്തോളം മുട്ടക്കോഴികൾ ചത്തു.പോത്തൻകോട് ശാന്തിഗിരിക്കു സമീപം തോപ്പിൽ പൗൾട്രി ഫാമിലെ മുട്ടക്കോഴി കുഞ്ഞുങ്ങളാണ് കാട്ടുപന്നികളുടെ ആക്രമണത്തെ തുടർന്നു ചത്തത്.
കർഷകരായ രഞ്ജിത്തും അരവിന്ദാക്ഷനും ചേർന്ന് ആറായിരത്തോളം കോഴിക്കുഞ്ഞുങ്ങളെയാണ് വളർത്തുന്നത്.ഇവയിൽ ആയിരത്തോളം എണ്ണമാണ് ചത്തത്. ഒരു ലക്ഷത്തോളം രൂപയുടെ നഷ്ടമാണ് കണക്കാക്കുന്നത്.
ഇതിനു മുൻപും പന്നിക്കൂട്ടം കോഴിഫാമിൽ അക്രമം നടത്തിയിട്ടുണ്ട്.കാട്ടുപന്നി ശല്യം രൂക്ഷമായ ഈ പ്രദേശത്ത് നിരന്തരമായി കാർഷിക വിളകൾ നശിപ്പിക്കാറുണ്ട്.എന്നാൽ അധികൃതർ പരാതികൾക്കൊന്നും യാതൊരുവിധ നടപടിയും സ്വീകരിക്കാറില്ലെന്ന് കർഷകർ പരാതിപ്പെടുന്നു.
ലോണെടുത്തും മറ്റും കൃഷി ചെയ്യുന്ന കർഷകർക്ക് മഴക്കെടുതിക്കു പുറമേയുള്ള പന്നിശല്യവും കൂടി താങ്ങാനുള്ള ശേഷിയില്ലെന്ന് ഇവർ പറയുന്നു
