മൺ ചിരാതുകളിൽ അഗ്നിപകർന്ന് ‘അമ്മ’ വെളിച്ചം തെളിച്ച് കാട്ടാക്കട കുളത്തുമ്മൽ എൽ പി സ്കൂളിൽ കുരുന്നുകളുടെ പ്രവേശനോത്സവം
കാട്ടാക്കട:
മൺ ചിരാതുകളിൽ അഗ്നിപകർന്ന് ‘അമ്മ’ വെളിച്ചം തെളിച്ച് കാട്ടാക്കട കുളത്തുമ്മൽ എൽ പി സ്കൂളിൽ കുരുന്നുകളുടെ പ്രവേശനോത്സവം പ്രത്യേകത നിറഞ്ഞതായി. ക്ലാസ്സ് മുറികളിൽ ഇരുന്ന ഒന്നാം ക്ലാസ് പ്രവേശനം നേടിയ കുട്ടികൾക്കു ബലൂണും, വർണ്ണ കിരീടവും നൽകി വധ്യമേള അകമ്പടിയോടെ ആഡിറ്റോറിത്തിലേക്ക് ആനയിച്ചു. തുടർന്ന് ആയിൽ തുടങ്ങുന്നു ഭാഷ,അമ്മയിൽ ഉണരുന്നു സ്നേഹം,അറിവുകൾ പകരുന്നു അധ്യാപകർ,തണലായി നിറയുന്ന അച്ഛൻ എന്നെ തളരാതെ കാക്കുന്ന ദൈവം എന്ന് തുടങ്ങുന്ന പ്രാർത്ഥന ഗാനത്തോടെ ആരംഭിച്ച ചടങ്ങ് കാട്ടാക്കട ഗ്രാമപഞ്ചായത്ത് പ്രസിഡൻ്റ് കെ അനിൽകുമാർ ഉദ്ഘാടനം ചെയ്തു.
പി ടി എ പ്രസിഡൻ്റ് അനിൽ കുമാർ അധ്യക്ഷനായ ചടങ്ങിൽ മുഖ്യ അതിഥിയായി എത്തിയ നാടൻ പാട്ട് കലാകാരൻ ജോയ് നന്ദാവനം കുരുന്നുകൾക്കു പാട്ടുപാടിയും കഥപറഞ്ഞ് കൊടുത്തും അവരുടെ സ്കൂൾ പ്രവേശനം ആഹ്ലാദ ഭരിതമാക്കി.
ചടങ്ങിൽ വിദ്യാർത്ഥികൾക്കുള്ള സ്കൂൾ ബാഗ്,കുട എന്നിവ വിതരണം ചെയ്തു.പ്രധാന അധ്യാപകൻ എസ് കെ സനൽകുമാർ,വാർഡ് അംഗം സതീന്ദ്രൻ, മദർ പി ടി എ പ്രസിഡൻ്റ് അലി ഫാത്തിമ,പിടിഎ അംഗങ്ങളായ പ്രവീൺ, ഷഹീർ,റിയാസ്, സീനിയർ അസിസ്റ്റൻ്റ് ഷീല, എസ്സ് ആര് ജി കൺവീനർ സിന്ധു,സ്റ്റാഫ് സെക്രട്ടറി ശ്രീജ എസ് കെ തുടങ്ങിയവർ സന്നിഹിതരായിരുന്നു.
